පසුපෙළ සිසුවෙකුගෙන්- කතෘ අඣාතයි.

කොට බිත්තියෙන් වට කොට සැදු සිර කුටිය තුළ

සිර කරනු බැරි සිතිවිලි රැසක උරුමකරුවා මං

කවදාවත්ම නො ඉස්සෙන අත් ඇති

පසුපෙළට අණසක පතුරුවන

පදක්කම් අහිමි නායකතුමන් මං

අකුරු ඉලක්කම් දත්

ඉදිරි පෙළ සිසුන් හා බැඳි

පාඩම් කියා දෙන විට

ඔබේ දෑසට හසු නොවන

අසරණ දරුවනට සහනයක් ගෙන එන

විහිළුකාරයා මං

ප්‍රගති සටහන මත

රතු කොළ කහ වර්ණ සියල්ලම දරාගත්

කළු තිත් පෙළට හිමිකම් කියන

අමනයා නොවේ ද මං

ජීවිතයේ මුල් වරට මම ඔබෙන් විමසමි

පාසල හා මගේ ඇසුරට

හය වසක් ගෙවී ඇති මුත්

මට අකුරු කියා දෙනු බැරි

ඔබ හට උරුම කළු තිත

කොහි සටහන් වේ ද ගුරුතුමනි........

කතෘ අඣාතයි