සුරුට්ටුවක් වගේ වස්තුව

පසුගිය ඔක්තෝබර් 9 වෙනිදා Pan – STARRS අභ්‍යාවකාශ නිරීක්ෂණ වැඩසටහනට අපුරු අත්භූත ආකාශ වස්තුවක් හමුවුණා.

සුරුට්ටුවක හැඩයක් ගත්ත මේ ආකාශ වස්තුව නිතර පෘථිවිය පසු කරමින් යන අනෙකුත් උල්කාපාත හා ග්‍රාහක කැබලි වගේ රළු ගෝලාකාර හැඩයක් ගත්තේ නෑ. ඒ නිසා එය අභ්‍යාවකාශය තුල ස්වභාවිකව හැදිච්ච එකක් වෙන්න බෑ කියලයි විද්‍යාඥයින් කියන්නේ.

බොහෝ ග්‍රාහක මෙන්ම උල්කාපාත පෘථිවියට කඩා වැටෙනවා. එහෙමත් නැත්නම් පෘථිවිය පසු කරගෙන යනවා. මේවා යේ ප්‍රභවය වෙන්නේ බොහෝවිට පෘථිවි ග්‍රහ මණ්ඩලයේ තියෙන ග්‍රාහක වළල්ල, එහෙම නැත්නම් Oort  Cloud කියන,  ප්ලුටෝ ග්‍රහයාට ගොඩාක් දුරින් සුර්යයා වටා ගමන් කරන අයිස් කැට වලාවකින් ලු.

A/207 U කියන මේ අපුරු ග්‍රහ වස්තුව අපේ සෞර ග්‍රහ මණ්ඩලයට ඇවිල්ලා තියෙන්නේ වෙනත් තාරකා මණ්ඩලයකින් කියලා තමයි තාරකා විද්‍යාඥයින් කියන්නේ. ඒකෙ තේරුම මේ ග්‍රහ වස්තුව තමයි සෞරග්‍රහ මණ්ඩලයට ආපු පළවෙනි අන්තර්-තාරකා (Inter-Stellar) සංචාරකයා.

මෙහි මතුපිට ඇති රතු පැහැයට හුරු වර්ණය, තාරකා අතර ගමන් කිරීමේදී දැඩි කොස්මික් කිරණ වලට දිග කාලයක් අහුවෙලා තිබීම නිසා ඇති වූ දෙයක් බවයි ඔවුන්ගේ මතය.

වෙනත් ග්‍රාහක සහ උල්කාපාතවල වගේ මේකෙන් ගෑස් හා දුවිලි නිකුත් වෙන්නේ නෑ. මේ වගේ දුවිලි වලාවන් සුර්යයාට ලංවෙද්දි වල්ගා තරු වගේ පේන්න ගන්නවා. මේකේ එහෙම ගෑස් හා දුවිලි නිකුත් වීමක් නොවන්නේ මෙය ස්වභාවික වස්තුවක් නොවන, කෘත්‍රිම ව හදපු එකක් නිසා ලු.

තාරකා විද්‍යාඥයින් මේකට නමක් දාලා.

Oumuamua. ඒ කියන්නේ හවායි දුපතේ ස්වදේශිකයන්ගේ බසින් ඈත දුරක සිට පැමිණි අමුත්තා යන අරුතින්.

මෙය පිටසක්වල ජීවින් වර්ගයක් නිපදවපු දියුණු අන්තර් තාරකා අභ්‍යාවකාශ යානයක් වෙන්නත් පුළුවන් ලු.එහෙම කියන්නේ අධික වේගයෙන් යන අභ්‍යාවකාශ යානයකට සුදුසුම හැඩය සුරුට්ටුවක හෝ ඉඳි කට්ටක හැඩය නිසා.

වාතය නැති ශුන්‍යයක වුනත් අධික වේගයෙන් යන යානයකට අභ්‍යාවකාශයේ සුළුවෙන් තියෙන හයිඩ්‍රජන් අණු බාධකයක් වෙන්න පුළුවන්. මේ බාධකය බිඳින්න නම් අභ්‍යාවකාශ යානය ගුවන් යානයක වගේ හැඩයක් වෙන්න ඕන කියලයි කියවෙන්නේ.

මේ අභ්‍යාවකාශ වස්තුව තුල අනෙකුත් අභ්‍යාවකාශ යානයක වගේ එන්ජින් හෝ වෙනත් ප්‍රචාලක උපක්‍රමයක් දකින්නට නැහැ. ඒත් මේක සෞරග්‍රහ මණ්ඩලයට ඇතුළු වුණායින් පස්සේ තමන්ගේ එන්ජින් නිවලා දාලා හිරුගේ ගුරුත්වය උපයෝගී කරගෙන සෞරග්‍රහ මණ්ඩලය හරහා ගමන් කරනවා ඇති කියලා විද්‍යාඥයෝ කියනවා.

දිගින් දිගටම එන්ජින් දල්වාගෙන කිලෝ මීටර මිලියන ගණනක් දුවන්න ඉන්ධන අරගෙන යන්න බැරි නිසා, වෙනත් ග්‍රහලෝකවලට යවන යානා, සුර්යයාගේ ගුරුත්වයට අසුවෙන කක්ෂයකට යොමුකරලා, සුර්යයාගේ ගුරුත්වාකර්ෂණය භාවිතා කරගෙන අදාළ ග්‍රහලෝක වලට යවන එක තමයි පෘථිවියෙන් අඟහරු හා වෙනත් ග්‍රහලෝකවලට යවන ඔක්කොම යානා සඳහා භාවිත කරන උපක්‍රමය.

සමහර විද්‍යාඥයින් කියන විදියට මේක සුවිසල් පිටසක්වල යානයකින් අපේ සෞරග්‍රහ මණ්ඩලය නිරීක්ෂණය කරන්න එවපු උප යානයක්. අපේ සෞරග්‍රහ මණ්ඩලයෙන් ඉවත්වූ විගස මේ යානය නැවතත් තමන්ගේ මව් යානය වෙත යයි.

තව කට්ටියක් කියන්නේ මේක අබලන් වෙලා  අතරමග දාලා ගිය යානයක්, මේක පාලනයක් නැතුව ඔහේ ඉබාගාතේ යනවා කියලයි.

මේ නාසා එකේ කට්ටිය ඒ ගැන තියපු සටහන

උදාර එස්.සී. විලත්ගමුව

අන්තර්ජාලය ඇසුරෙනි.