'සාර්ථක' මිනිහෙක්ට වාහනයක් තියෙන්නම ඕනද? (සාර්ථක මිනිහෙක්ගෙ කතාවක්)

අපේ ගමේ මීට අවුරුදු ගානකට කලින් අක්කර 35ක රබර් ඉඩමක් විකුණුව රබර් මිල වැටුණු කාලෙකදි. අවුරුද්දක් දෙකක් ගිහින් අපි දැක්ක ඒ හිස් ඉඩමෙ ටික ටික තේ හිටවන්න ගන්නව.

කලු මිටි මැදිවියේ හාදයෙක් උදේ කොහෙදෝ ඉඳන් බස් එකේ ඇවිත් කි. මි. 2ක් පයින් ඇවිත් වත්තෙ වැඩ කලා මුලදි. පස්සෙ ටික ටික ගමේ කුලී කාරයො කීප දෙනෙකුත් ඕකෙ වැඩකලා. ඔය කාලෙදිම අපේ ගමට ඉඩම් අරන් අලුතින් පදිංචියට ආව බොගවන්තලාව පැත්තෙ තේ වත්තක වැඩ කරපු හාදයෙක්. මිනිහ නිතරම කිව්ව ඔය වත්තෙ තේ හරියන්නෙ නෑ කියල.

හැබැයි අර කලු කොට හාදය දිගටම වැඩ කලා. මිනිහ දුර ඉඳල ආවට ගමේ එවුන්ට කලින් උදේ වැඩට ආව. ගමේ උන් ගියාට පස්සෙයි වැඩ ඇරිල යන්නෙ. නිවාඩු දාට එහෙමත් මිනිහ සෝට ගහන් වැඩ කරනව අපි දැකල තියෙනව.

මිනිහ තමයි මාසෙ අන්තිමට කට්ටියගෙ පඩි සල්ලි බේරන්නෙත්.

ඔය කාලෙදි මම කැම්පස් එකේ හිටියෙ. අහල පහල පොඩි එවුන්ට (o/l maths)

පංති කලා නොමිලේ.

ඔය වත්තෙ වැඩ කරන අයගෙ ලමයි කීප දෙනෙකුත් මගෙ පංතියට ආව. මම පංති කරනව කියල අර කලු කොට හාදය එයාලගෙන් දැනගෙන දවසක් මට කීව පුතා මහන්සිය දෙන්නම් මගේ දුවට ගෙදරට ඇවිත් පංති කරන්න කියල.

මම එවෙලෙ කල්පණා කලා ජීවිතේට රු 60ක් දීල ත්‍රීවිල් එකේ නොයන එකා මට කීයක් දෙයිද කියල.

දවස් කීපයක් කිව්වට පස්සෙ මම ඕකට ගියා පාර හොයාගෙන.කිරිඳිවැල පැත්තෙ ගෙවල් ඒකගෙ.

ගියාට පස්සෙයි දන්නෙ ඒ කලු කොට හාදය අර වත්තෙ අයිති කාරය කියල.අපි හිතන් උන්නෙ ඌ අයිති කාරය වැඩට දාපු එකාය කියල.

ඒකට තව තේ පොල් අන්නාසි වතු එහෙමත් තිබුන. මම පංති කලේ බාල දුවට. ලොකු පුතයි දෙවෙනියයි උපාධිය කරන්න ඔස්ට්‍රේලියා ගිහින්.

හැබැයි ගෙදර වාහනයක් තිබුනෙ නෑ.

ඔයා පෝස්ට් එකේ දාපු ප්‍රශ්නෙට මේ කතාවත් ගලපල බලන්න අදහසක් ගන්න.

ලෝකෙට ණය වෙලා වාහනේ යන මිනිස්සු ඉන්න රටේ වෙනස් විදියකට ජීවත්වෙන මිනිහෙක්.

බුද්ධි නන්දන කහඳවල

ජීවිතේ ඔහොම තමයි..(හෘද රෝගියෙකුගේ අත්දැකීමක්)

මට පළවැනි හාට් ඇටක් එක හැදුනේ අවුරුදු හතළිස් හයේදී. පහුගිය දිනවල මගේ ළබැදියන් කිහිප දෙනෙක්ම හෘදයාබාධ වලට ගොදුරු වුනු නිසා මගේ ඒ අත්දැකීම් බෙදා හදා ගතයුතු යැයි හිතුවා.

එදා සතියේ  දවසක්. බිරිඳ ඇගේ ඥාතියෙකුගේ  මඟුලක් නිසා උදෙන්ම නුවර යන්න පිටත් වෙලා. කොළඹ අවට ඉන්න එයාගෙ සියළු ඥාති පිරිවරත් එක්කම.  දරුවො දෙන්නා උදෙන්ම ඉස්කෝලෙ ගිහින්. සියළුම in laws ලා කැළණි පාලමත් පහු කරපු සතුට සමරන්න උදෙන්ම පාරට බහින්න හිතුවත් විනාඩි පහෙන් පහට වෙලාව මතක් කරන්න කෙනෙක් නැති නිසා පරක්කු වුනා. අන්තිමට ගෙවල් ළඟ ත්‍රී වීල් එකකට කෝල් කලා කොහොම හරි වෙලාවට වැඩට යන්න.

එතකොටත් මම ලෑස්ති වෙනවා. ත්‍රී වීලරේ ගේට්ටුව ළඟ. එක පාරට පපුව මැද්දෙන් උණු වෙලා වැගිරෙන කේතලයක් තිබ්බා වගේ පපුව ඇතුලේ ලෝ දිය ගලනවා දැනුනා. පොතේ කියන පිළිවෙලට වම් අත දිගේ වේදනාවක් ආවේ නෑ. නමුත් තේරුනා මට ඇටැක් එකක් ඇවිත් බව. ගිහිං ත්‍රී වීලරේ වාඩිවෙලා කිව්වා මාව ඉක්මනට ඉස්පිරිතාලෙකට ගෙනියන්න කියලා. 

ප්‍රශ්නෙ වුනේ එතනයි. කොහේටද යන්නේ. ඒ කාලෙ පුතාට ඇදුම හැදෙන නිසා පුතාට වාෂ්ප අල්ලන්න කොළඹ පෞද්ගලික රෝහලකට අපි නිතර යනවා. එතන හොඳට හුරු පුරුදුයි. ඒ පුරුද්දට මම කිව්වේ එතැනට යමු කියලයි. දැන් ත්‍රී වීලරෙ බොරලැස්ගමුවෙ ඉඳන් කොළඹ පැත්තට යනවා. මම පපුව අල්ලගෙන පිටිපස්සේ සීට් එකේ. රත්තනපිටිය, පැපිලියාන පහුවෙද්දී මම ඒවගෙන් සමුගන්නවා. මොකද මට හිතෙනවා මේ හන්දි, කඩ පිලවල් දකින අන්තිම දවස කියලා.

කොහුවල හංදියෙදී අපිට කලින් සිග්නල් ලයිට් එක ඉස්සර වුනා. රතු වැටුණා. ඒ එක්කම කොළ පාටට පත්තු වුනු ඊතලේ පෙන්නුවා වමට හරවන්න අවසරයි කියලා. වමට හැරෙව්වොත් කළුබෝවිල ඉස්පිරිතාලෙට යන්න පුළුවන්. මම ජීවිතේට කියපු ඥනවන්තම වචන ටික කිව්වෙ එතකොටයි. "අපි කළුබෝවිලට යමු".

විනාඩි දෙකකින් අපි රෝහල් ගේට්ටුව ළඟ. තව විනාඩි තුනකින් මම හදිසි ප්‍රතිකාර ඒකකයේ, සිංහලෙන් කිව්වොත් ඊ සී යූ එකේ, ඇඳක් උඩ, එහෙන් මෙහෙන් ඇඟට අමුනපු වයර් ගොඩක් එක්ක. මාව වට කර ගත්තු රෝහල් කාර්ය මණ්ඩලයක් එක්ක. 

මට තේරුණු විදිහට අඩුගානේ එතන හිටිය  දෙන්නෙක් දොස්තරලා. ඒ එක්කෙනෙක් කිව්වා මට හෘදයාබාධයක් වැලදී ඇති බව. ඒත් එක්කම මගේ හිතේ විශ්වාසය තහවුරු කලා මම දැන් ඔවුන් සමග නිසා බය වෙන්නට හේතුවක් නැති බව. ඒ එක්කම කිව්වා මට හෙළවෙන්නට හෝ කතා කරන්නට අවසර නැති බව. ඉතා කුඩා චලනයක් පවා හදවතට හොඳ නැති බව. 

නමුත් ඔවුන්ට මගෙන් අසන්නට ප්‍රශ්ණ තිබුනා. පිළිතුර ඔව් හෝ නෑ ප්‍රශ්ණ. මේ පළවෙනි ඇටැක්

එකද, මම මොකුත් බෙහෙතක් ගන්නවද මේ සම්බන්ධව, මට ඇලජික් බෙහෙත් තියනවාද, පවුලේ අයට මේ රෝගය තියනවාද වගේ ප්‍රශ්ණ. මම ඇස් බෝල වමට හා දකුණට හැරවීමෙන් ඔව් හෝ නෑ කියන්න ඕනෙ. හැම කතා කරන වචනයක්ම, හැම චලනයක්ම මට අවාසියි...!

එදා මම පෞද්ගලික රෝහලට ගියා නම් සියල්ල වෙනස් වෙන්න තිබුනා. වාහන තදබදය එක්ක කොළඹට එන්න තව පැය බාගයක්වත් යාවි. මං පස්සෙ දැනගත්ත විදිහට හෘදයාබාධයකදි හැම තත්පරයක්ම වටිනවා. ආබාධය හැදුනු වෙලේ සිට ප්‍රතිකාර ලැබෙන තුරු හදවත හානියට ලක්වෙනවා. ජීවිතේ බේරුනත් ඒ හානි වෙච්ච කොටස නැවත යථා තත්්වයට ගේන්න බැහැ. අදත් එකෝ පරීක්ෂාවක් කලාම දොස්තරවරු පෙන්නනවා මගේ හදවතේ හානි වු කොටස. ඒ ටික අක්‍රීයයි අදටත් සදහටත්.

පෞද්ගලික රෝහල් හොඳයි වෛද්‍ය උපදේශනයක් ගන්න. ඒ කිව්වෙ දොස්තර කෙනෙක් චැනල් කරන්න. එහෙම නැතිනම් කලින් එකඟ වූ වෙන් කරගත් දිනයක රෝහල් ගත වී ශල්‍ය කර්මයක් වුනත් කරගන්න. නමුත් මගේ අත්දැකීම නම් හදිසි අවස්ථාවකදී ආණ්ඩුවේ ඉස්පිරිතාලේ තමයි. මමත් කළුබෝවිල රෝහල මගේ ජීවිතය බේරුවට පස්සෙ නිවාඩු පාඩුවෙ බයිපාස් එක කරගත්තේ පෞද්ගලික රෝහලක.

ඔය ඉඩම් විකුණන කට්ටිය දැන්වීම් දානවා ඉස්කෝල වලට කිට්ටුයි සුපර් මාර්කට් වලට කිට්ටුයි කියලා. හැබැයි ආණ්ඩුවේ ඉස්පිරිතාලයක් කිට්ටුව නම් ගන්න එකාගේ ජීවිතේට වටීවි සමහර විට අනෙක් ඔක්කෝටම වැඩිය.

එතකොට නුවර ගිය කට්ටිය. උන්ට පිළිමතලාව හරියෙදි කවුදෝ කෝල් එකක් දීලා මාව වාට්ටුවකට දාපු ගමන් මෙන්න මගේ ඇඳ වටේ කට්ටියම. අර මගුල් ඇඳුම් ආයිත්තම් එක්කම. දෙවෙනි හාට් ඇටක් එකෙන් මම බේරුණේ අනූනවයෙන්.

ජීවිතේ ඔහොම තමයි.

හෘද රෝගියෙකුගේ අත්දැකීමක්..

ගල්පොත්තවෙල පංසලේ මීරිගම ටීචර්ගෙ සිස්සත්ව පන්තියේ සිට කැන්බරා නගරයට..

අපේ කාලෙ හතර වසර කියන්නෙ හැමෝම ශිෂ්‍යත්ව පංති උන්මාදයෙන් පිරිලා පිස්සු වැටෙන කාලෙ. අම්මලා හැමෝ ම තමන්ගෙ දරුවා හොඳ ම ශිෂ්‍යත්ව පංතියට දාගන්න පුදුම තරගයක්.

ඒ අතර එක් දරුවෙක් හිටියා ඒ ගැන වගේ වගක් නැති.

ධම්මිකා මිස්ගෙ පංතිය සහ මීරිගම මිස්ගෙ පංතිය කියන්නෙ පැල්මඩුල්ල අවට හැම අම්මෙක්ගෙ ම හීනයක්.

එතනින් අර දරුවාට ධම්මිකා මිස්ගෙ පංතියෙ ෆ්‍රී කාඩ් එකක් හම්බෙනවා. ඒ දරුවා ඉතා ආසාවෙන් ඒ පංතියට යනවා. 'දැන් ශිෂ්‍යත්ව විබාගෙ පාස් වෙතෑකි'.

තුන්වෙනි සතියෙ පංතියෙ විබාගයක්. ප්‍රශ්න පත්තරේ බෙදලා මිස් අහනවා 'ළමයි, පේපර් එකේ ප්‍රින්ටිං මිස්‍ටේක් තියෙනවනං කියන්න'. ළමයි දෙතුන් දෙනෙක් එක එක ඒවා කියනවා. අර දරුවට පේන්නෙ ම 13 වෙනි ප්‍රශ්නෙට දෙන ලකුණු ප්‍රමාණය සටහන් වෙලා නැති එක. ඒ දරුවා නැගිටලා ඒක කියනවා. ධම්මිකා මිස් එක පාරට ම 'ෆ්‍රී කාඩ් දුන්න එකට හරියන්නද ඕන්නනැති පණ්ඩිතකම් කියන්නෙ' කියලා. ලැජ්ජාව ඉහවහා දුවපු ඒ දරුවා ප්‍රශ්න පත්තරේ මේසෙ උඩ තියලා බෑග් එකත් අරගෙන ගෙදර දුවනවා.

ඒ දරුවට ගෙදර හිටියත් දුකයි.

මීරිගම මිස් පන්සලේ බණ සාලාවෙ එක කෙළවරක පංතිය කරන්වා. පන්සලේ තාප්පෙ ගාවට උණත් සද්දෙ ඇහෙනවා.

ඒ දරුව එක බදාදා හවස් වරුවක පන්සල් යනවා. බණ සාලාවෙ අනික් කෙළවරේ බංකුවක වාඩි වෙලා පංතියෙ උගන්න ඒවා දිහා බලා ඉන්නවා.

සති දෙක තුනක් මේ වැඩේ දිහා බලා හිටිය එක කරුණාවන්ත මහත්මයෙක් 'පුතා ඊළඟ දවසෙ තාත්තට එන්න කියන්න' කියනවා.

අන්තිමට ඒ දරුවා ඊට පස්සෙ සතියෙ ඉඳලා මීරිගම මිස්ගෙ පංතියට යනවා.

අර කරුණාවන්ත මහත්මයා හැම මාසෙ ම පළවෙනි බදාදට බයික් එකේ ඇවිත් 'ආ පුතා පංති පීස්' කියලා රුපියල් සියයක් දෙනවා.

ඒ දරුවා ඒ සල්ලි දීලා ලා නිල්පාට පංති කාඩ් එකක් අරගන්නවා.

එහෙම මාසයක් දෙකක් යද්දි එක අම්මා කෙනෙක් 'පුතේ ඔයා දවල්ට කන්නෙ නෑ නේද?'කියල අහනවා.

ඊළඟ සතියෙ ඉඳලා ඒ දරුවට දවල් ඉස්කෝලෙ ඇරුණාම පන්ති පටං ගන්න කළින් කන්න බත් පාර්සලයක් හම්බ වෙනවා.

ඒ දරුව තමන්ගෙ ජීවිතෙ පළමුවෙනි ඔම්ලට් එක සහ නෙලුම් අල මාලුව කනවා.

කොහොම හරි ඒ දරුවා ශිෂ්‍යත්ව විබාගයට ඉස්කෝලෙන් ම දෙවෙනියට ලකුණු අරං පාස් වෙනවා.

********

ප්‍රබන්ධයක් නෙමෙයි. හැබෑ ජීවිතේ හුස්ම ගත්තු කතාවක්.

ඊට පස්සෙ ඒ දරුවා කැන්බරා නුවර විශ්ව විද්‍යාලයක පශ්චාත් උපාධියක් හදාරන්න අවස්ථාව හිමි කරගන්නවා.

මේ ලෝකෙ හරි පුදුමාකාරයි.

හැම කෙනාගෙ ම ජීවිතවලට හිමි ධාවන වේගයක් සහ රටාවක් නියම වෙලා/කරලා (?) තියෙනවා.

මේ මොහොතෙත් ඒ දරුවා ඉතා ම තුෂ්නිම්භූත ව ඒ රටාව, ඒ අතීතය ගැන හීනමය මතකයක දිලිසෙන ඇස් ඇති වඉතා සතුටින් හිනැහෙනවා.

කැන්බරා නගරයේ

පාලු පාරක

ඔහේ ඇවිදන් යද්දී

ගල්පොත්තවෙල පංසලේ

මීරිගම ටීචර්ගෙ සිස්ස්‍යත්ව පංතියට

පන්ති පීස් රුපියල් සීය

ගෙවාගන්න බැරි ව හිටිය

එක් කුඩා දරුවෙක්

මතකයේ එක් අඳුරු තැනක හිඳ

සිනාසෙයි දෙනෙත් දල්වමින.....

ලීලානාත් වික්‍රමආරච්චි

වසර 43 කට පසු අගමැතිවරයෙකු පත් වූ කියුබාවේ දේශපාලනයේ නවතම තතු..

කියුබානු ජනාධිපති මිගෙල් ඩයස්-කැනල් සෙනසුරාදා මැනුවෙල් මාරෙරෝ කෘස් රටේ අගමැති ලෙස නම් කළ අතර එය දශක හතරකට වැඩි කාලයක් තිස්සේ කියුබානු දේශපාලනය තුළ නොපවතින භූමිකාවකි.

කියුබාවේ සංචාරක ඇමතිවරයා ලෙස වසර 16 කට ආසන්න කාලයක් සේවය කළ මාරෙරෝ වසර පහක කාලයක් සඳහා අගමැති ලෙස නම් කරන ලද බව කියුබාවේ රාජ්‍ය පුවත් ඒසීඑන් ආයතනය පවසයි.

ඔහු කියුබාවේ ත්‍රිවිධ හමුදාවේ කර්නල්වරයෙකු වූ අතර කොමියුනිස්ට් පාලනය යටතේ පැවති රටේ අත්‍යවශ්‍ය මුදල් අවශ්‍යතාවයන් සපයන රාජ්‍ය සංචාරක කර්මාන්තයේ ප්‍රධානියා ලෙස කටයුතු කළේය.

ෆිදෙල් කැස්ත්‍රෝ රටේ අවසාන අගමැති විය. ඔහු 1959 සිට 1976 දෙසැම්බර් දක්වා රාජ්‍ය මන්ත්‍රණ සභාවේ සභාපති ධුරය හෙබවූ අතර එය ජනාධිපති සහ අගමැති තනතුරු වෙනුවට විය.
කියුබාවේ ජාතික සභාවේ නියෝජිතයින් 594 දෙනා විසින් මරේරෝගේ පත්වීම ඒකමතිකව අනුමත කරන ලදී.

පත්වීම සඳහා පාර්ලිමේන්තුවේ පරම බහුතරය අවශ්‍ය බව ඒසීඑන් පැවසීය. සෙනසුරාදා සැසිවාරයේදී නියෝජ්‍ය අග්‍රාමාත්‍යවරුන් සහ අමාත්‍ය මණ්ඩලයේ අනෙකුත් සාමාජිකයින් පත් කරන ලදී.

ඩයස්-කැනල් රාජ්‍ය නායකයා ලෙසත්, සැබෑ බලය පවතින කොමියුනිස්ට් පක්ෂයේ පළමු ලේකම්වරයා ලෙසත් රාවුල් කැස්ත්‍රෝ කටයුතු කරයි.

කියුබානු රජයේ එදිනෙදා මෙහෙයුම් කළමනාකරණය කිරීමට අගමැතිවරයා අපේක්ෂා කරන නමුත් ඔහු ජනාධිපතිවරයා යටතේ සේවය කරයි.

කැස්ත්‍රෝ යටතේ 1976 සෝවියට් යුගයේ ප්‍රඥප්තිය වෙනුවට නව ව්‍යවස්ථාවක් කියුබානු ඡන්දදායකයින් විසින් 2019 පෙබරවාරි මාසයේදී අනුමත කරන ලදී. එය පෞද්ගලික දේපළ හා විදේශ ආයෝජන ආරක්ෂා කරන අතර පළමු වරට ජනාධිපති ධුරයේ වසර පහක සේවා කාලයක් ලබා දෙයි.

නව ආණ්ඩුක්‍රම ව්‍යවස්ථාව යටතේ, කියුබාවේ තවමත් අවසර දී ඇති එකම දේශපාලන පක්ෂය කොමියුනිස්ට් පක්ෂය වන අතර එය රජයේ සියලු ප්‍රතිපත්ති සඳහා මඟ පෙන්වන බලවේගය ලෙස පවතී.

CNN ඇසුරිනි.

අවසන් කොටස - ආනන්ද් මහින්ද්‍රාගේ සාර්ථකත්වයේ පාඩම

ආනන්ද් මහින්ද්‍රා - කිනම් කළෙක හෝ නිරවද්‍ය අවදානම් දැරීමට දත් ව්‍යවසායකයා (පළමු කොටස)

දෙවැනි කොටස - ඉන්දියාවේ මතු නොව ලොවෙහිම අතු ඉති ලා වැඩුණු මහින්ද්‍රා නම් මහා වෘක්ෂය

1. සාමකාමීව ගැටළු විසඳාගන්නට ඉගෙන ගන්න. (Learn to resolve peacefully)

දිවියේ බොහෝ අවස්ථාවන්හිදී ඔබට ඉවසිලිවන්තව ස්ථාවර මනසකින් ඉන්නට සිදුවේවි. සේවකයන් විසින්ම ව්‍යාපාරය වසා දැමීමට සිදුවන විරෝධතා පළ කරද්දී පවා මහින්ද්‍රා එය කළමනාකරණය කළ අයුරු බලන්න. ඔහු තම සුපුරුදු කොන්දේසි මත රැඳී සිටියා මිස තම සමාගම තුළ අලස බවට හා අකාර්යක්ෂමතාවට දිනන්නට ඉඩ දුන්නේ නැත.

   2. නොපසුබට උත්සාහය ප්‍රගුණ කරන්න. (Inculcate perseverance)

මහින්ද්‍රාගේ නොසෙල්වෙන අධ්‍යාත්මය සැමදා නායකත්වය ලබාදුන්නේ මහින්ද්‍රා සමාගම ඉන්දියාවේ විශාලතම සමූහ ව්‍යාපාරයන් හි මුල්තැනකට වැඩෙන්නටයි. නිදහසට පෙර යුගයේ ව්‍යාපාර සමාගම් තරගකාරී යුගයේ වෙළෙඳපොළ නායකත්වයන් කරා පරිවර්තනය වීම ඉන්දියාව තුළ සරළ දෙයක් නොවුණි. ඔහු මේ සියළු ගැටලුවලට මුහුණ දුන්නේ මධ්‍යගත ආර්ථික ක්‍රමයක (Licence Raj) සිට ලිබරල්කරණය දක්වා ඉන්දියානු ආර්ථිකය වෙනස් වෙද්දී ය. නමුත් ඔහුගේ උට්ඨාන වීර්යය විශේෂිත විය.

   3. හැමවිටම ලොකුවට හිතන්න. (Always think big)

මහින්ද්‍රාට යමක් සාර්ථකව සිදුකිරීම ගැන දැක්මක් හැමවිටම තිබූ අතර, පාලනය කිරීමේ බලය, වෙන්කිරීමේ සහ සිතිවිලි භාවිත කිරීම සැසඳිය නොහැකි අයුරින් විශිෂ්ඨය. මේ මිනිසාට අභියෝග කිරීමේ හා ලොකුවට සිහින දැකීමේ අනන්ත දහිරියක් තිබිණ. මහින්ද්‍රා සහ මහින්ද්‍රා ගව්වක් උසට ඉහළ නංවන්නට නිරතුරු පියවර ගත්තේය.

    4. නිරතුරු ඉගෙන ගන්න. (Keep learning)

ආනන්ද් මහින්ද්‍රා සමාජ මාධ්‍ය තුළ සියළු දෙනා සමග සෘජුවම සම්බන්ධ වී සිටියේය. එය රටේ වඩාත් බලසම්පන්නම තාක්ෂණවාදී ව්‍යාපාරික චරිත අතර ඔහු බබළවන්නට හේතු විය. තාක්ෂණය හෝ තරගකරුවන් අතර වඩාත් බය උපදවන දේවල් ඉදිරියේ පරාජය වීම ඔහු ප්‍රතික්ෂේප කළේය.  ඔහු වඩාත් අලුත් දේ සහ නවතම ක්‍රමවිධි උගනිමින් ඔවුන්ව පරාජය කළේය. ඔහු තවදුරටත් පරණ ව්‍යාපාරික පාසලට අයිති වූවෙක් නොවේ. ඔහු ඉන්දීය ව්‍යාපාර ක්ෂේත්‍රයේ ශූරයා ය.

    5. පරිණාමය වන්න/ විකාසනය වන්න (Evolve)

සෑම ක්ෂේත්‍රයකම ව්‍යාපාරික අංශයන්ගෙන් පිරිපුන් සමාජීය සහ පාරිසරික වශයෙන් වගකීම් සහගත විශ්වීය ව්‍යාපාරික ජාලයක් බවට මහින්ද්‍රා සමාගම පරිණාමය විය. කෙනෙකුගේ දියුණුව සඳහා අලුත් වෙනස්වීම් වලට විවෘත වීම අත්‍යාවශ්‍ය වේ. ආනන්ද් මහින්ද්‍රා එහි ප්‍රතිමූර්තියකි. ඔහු පැරණි ව්‍යාපාරික පාසලේ සාමාජිකයකු වුවද, මහින්ද්‍රා නිරතුරු සමාජ මාධ්‍යය තුළ සක්‍රීය ය. එහි තේරුම සීමාවකින් තොරව තරුණ පරපුර අතර සාර්ථක බවයි. පාරිභෝගික ස්පන්දනය ඔහු දන්නා බවයි.

    6. අධිෂ්ඨානය (Determination)

නිදහසට පෙර යුගයේ ව්‍යාපාරයක් ලෙස මහින්ද්‍රා සමාගම දියුණුව කරා ගෙන යාමට ආනන්ද් මහින්ද්‍රා හට විසල් කාර්යභාරයක් කළ යුතුව තිබිණ. මන්ද ඒ ඉන්දියාව තම ආර්ථිකය තුළ පරිවර්තනයන් සිදු කරමින් සිටි කාලය යි. 1991 දී Licence Raj ක්‍රමය අවසන් වූ අතර, වෙළෙඳපොළ විදෙස් ආයෝජන සඳහා විවෘත විය. කුඩා පරිමාණ ව්‍යාපාරයක් රටේ විශාලතම සමූහයක් බවට පත් කරවීමේ මහින්ද්‍රාගේ තිර අදිටන මල්පල ගැන්වූ කාලයකි එය.

නමුත් වඩාත් රසවත් පාඩම ඔහුගේ මේ ප්‍රකාශය තුල අන්තර්ගත වී තිබේ.

"මගේ අබිලාෂය මහින්ද්‍රා සහ මහින්ද්‍රා ලෝකයේ වඩාත්ම පාරිභෝගික කේන්ද්‍රීය සංවිධානය බවට පත් කරවීමයි. අප අපගේ පාරිභෝගිකයන් තේරුම් ගැනීම දෙසට වැඩි අවධානයක් යොමන්නේ නම් පාරිභෝගික කේන්ද්‍රීය නව්‍යතා වැඩි දියුණු කිරීමට අපට හැකි වනු ඇත." - ආනන්ද් මහින්ද්‍රා

ආනන්ද් මහින්ද්‍රා - කිනම් කළෙක හෝ නිරවද්‍ය අවදානම් දැරීමට දත් ව්‍යවසායකයා (දෙවන කොටස)

පළමු කොටසට මෙතනින්

ක්‍රීඩා සඳහාම භාවිතා කළ හැකි වාහනයක් (Sport Utility Vehicle) ඉන්දියාව තුළදීම නිපැයීමේ මහානීය අරමුණක් ඔහු සිත පිළිසිඳ ගන්නේ මේ අතරතුරදියි.

වාහන එකලස් කිරීම පිළිබඳව ඔහුගේ බුහුටි බව භාවිත කරමින් ද, විලාස (Designs) නිර්මාණය සඳහා මෙන්ම නිෂ්පාදන අත්හදාබැලීම් සහ මූලෝපකරණ සම්පාදනය සඳහා සැපයුම්කරුවන් කැඳවමින්ද, සමාගම ඒ සඳහා කල් යල් බැලීය. ඒ අනුව The Scorpio වෙළෙඳපොළට පැමිණෙන්නේ අමෙරිකන් ඩොලර් මිලියන 120 ක මුළු පිරිවැයක් සහිතවය. එය අමෙරිකන් නිෂ්පාදකයා ආයෝජනය කිරීමට බලාපොරොත්තු වූ මුදලින් පහෙන් එකකි. එය ඉන්දියාවේ ප්‍රමුඛතම SUVය වන්නේ ලොව පුරා අපනයනය කරමිනි.

මහින්ද්‍රා සමාගම 2007 වසර තුළදී සමාගම් කිහිපයක් අත්පත් කරගැනීම සහ ඒකාබද්ධ කරගැනීම විශේෂත්වයකි. ඒ අනුව මහින්ද්‍රා සහ මහින්ද්‍රා සමාගම පන්ජාබ් ට්‍රැක්ටර්ස් සමාගම තම ව්‍යාපාරයට ඒකාබද්ධ කරගත් අතර, ඉන් ඉන්දීය ට්‍රැක්ටර් වෙළෙඳපොළ තුළ තම කොටස දෙගුණයක් දක්වා වර්ධනය කරගනිමින් ලොව ප්‍රමුඛතම තරගකරුවකු බවට පත්විය. මහින්ද්‍රා ට්‍රැක්ටර්ස් යනු ඉන්දියාවේ, චීනයේ මෙන්ම අමෙරිකා එක්සත් ජනපදයේ ට්‍රැක්ටර් අලෙවි කරන ලෝකයේ විශාලතම ට්‍රැක්ටර් සමාගමයි.

2010 දී මහින්ද්‍රා විසින් දකුණු කොරියාවේ සැන්ග්‍යොන්ග් මෝටර් සමාගමේ 70% ක හිමිකාරත්වය මිල දී ගන්නේ මහින්ද්‍රාගේ බෙදාහැරීම් අතගැසීම් ජාලය ලතින් අමෙරිකාව, යුරෝපය සහ රුසියාව වෙතද ව්‍යාප්ත කරගනිමිනි. මේ සමූහ ව්‍යාපාරය කාර් රථ, විදුලි කාර් රථ, මෝටර් සයිකල්, ස්කූටර්, ට්‍රක් රථ, කුඩා යාත්‍රා සහ ගුවන් යානා නිපදවීමද සිදු කරයි.

ආනන්ද් මහින්ද්‍රා විසින් 2012 අගෝස්තු මාසයේදී මහින්ද්‍රා සමූහ ව්‍යාපාරයේ සභාපති පදවිය මෙන්ම කළමනාකාර අධ්‍යක්ෂ තනතුරද සියතට ගත්තේය. එවක පටන් මහින්ද්‍රා සහ මහින්ද්‍රා රෝහල්, ආරක්ෂක කටයුතු, තොරතුරු තාක්ෂණය සහ විදුලි වාහන ව්‍යාපාර සඳහා තම ආයෝජනය පුළුල් කරන්නේ අනෙකුත් ව්‍යාපාර අවස්ථා එලෙසම පවත්වාගෙන යන ගමන් ය.

• ·       Mahindra Systech මගින් මහාද්වීප පහටම අවශ්‍ය මෝටර් උපාංග නිෂ්පාදනය කරයි.
• 
  
• ·       Tech Mahindra යනු ඉන්දියාවේ පස්වන විශාලතම තොරතුරු තාක්ෂණ සේවය මෙන්ම තොරතුරු තාක්ෂණ උපදේශන සමාගමයි.
• 
  
• ·       Mahindra Retail (Mom & me) මගින් ගර්භණී මව්වරුන්ට සහ ළදරුවන්ට අවශ්‍ය නිෂ්පාදන අලෙවි කිරීම සිදු කරයි.
• 
  
• ·       160,000කට වඩා ඉන්දියානුවන් තම විවේකය සහ නිවාඩුව සෑම වසරකම ගත කරන්නේ Mahindra Holidays and Clubs සමගයි.
• 
  
• ·       Mahindra Agriculture යනු රටේ විශාලතම මිදි සහ දෙළුම් අපනයනකරුවායි.
• 
  
• ·       ඉන්දියානු රුපියල් කෝටි 15,000 ක වෙළෙඳපොළ ප්‍රාග්ධනකරණයක් සමගින් Mahindra Finance ග්‍රාමීය ඉන්දියාවේ විශාලතම බැංකු මූල්‍ය සමාගම බවට පත් වී සිටී.
• 
  
• ·       සූර්‍යබල ව්‍යාපෘති ව්‍යාපෘති අතික්‍රමණය කරන Mahindra Solar එම ව්‍යාපාරයේ ප්‍රමුඛතමයෙකි.
• 
  
• ·       Mahindra Logistics මේ වන විටත් ඉන්දියානු රුපියල් කෝටි 1,400ක ව්‍යාපාරයකි.

අද වන විට මහින්ද්‍රා සමූහ ව්‍යාපාරය අමෙරිකානු ඩොලර් බිලියන 16.2ක සංවිධානයක් වන අතර, ඉන්දියාවේ ප්‍රමුඛතම කර්මාන්ත 10 අතරින් එකකි.

ඉදිරියට........

ආනන්ද් මහින්ද්‍රා - කිනම් කළෙක හෝ නිරවද්‍ය අවදානම් දැරීමට දත් ව්‍යවසායකයා (පළමු කොටස)

ආනන්ද් මහින්ද්‍රා ඉපදුණේ 1955 මැයි 01 වෙනිදා  ඉන්දියාවේ මුම්බායි හීදී. මූලික අධ්‍යාපනයෙන් අනතුරුව හාවර්ඩ් විශ්වවිද්‍යාලයට ඇතුළත් වන ඔහු 1977 දී උපාධිය ලබයි. 1981 දී හාවර්ඩ් සරසවියෙන්ම තම එම්.බී.ඒ. උපාධිය සම්පූර්ණ කර ගන්නා ඔහු එම වසරේම මහින්ද්‍රා ආයතනයේ උප සමාගමක් වන මහින්ද්‍රා යූජින් ස්ටීල් සමාගම සමග එක්වන්නේ එහි මූල්‍ය අධ්‍යක්ෂගේ විධායක සහායකයෙකු ලෙසයි. 1989 දී එහි සභාපති සහ නියෝජ්‍ය කළමනාකාර අධ්‍යක්ෂ තනතුරට පත්වන හේ 1991 අප්‍රියෙල් 4 වැනිදා මහින්ද්‍රා සහ මහින්ද්‍රා සමාගමේ නියෝජ්‍ය කළමනාකාර අධ්‍යක්ෂ තනතුරින් පිදුම් ලබයි.

මහින්ද්‍රා සහ මහින්ද්‍රා හී පසුබිම් කතාවද ඉතා රසවත් එකකි. ආනන්ද් ගේ මුත්තණුවන් විසින් 1945 දී යකඩ අලෙවි ආයතනයක් ආරම්භ කරන්නේ ඔහුගේ සහෝදරයා සහ මිතුරකු වන ගුලාම් මොහමඩ් සමගය. 1947 ඉන්දියානු නිදහස් දිනය දාට පසුදා මොහමඩ් ආයතනය හැරයන්නේ පාකිස්ථානයේ පළමු මුදල් ඇමැතිවරයා වශයෙන් වැඩ භාරගැනීම සඳහායි. එනයින් සහෝදරයෝ දෙදෙන තම සමාගම මහින්ද්‍රා සහ මහින්ද්‍රා ලෙස නම වෙනස් කළහ.

ඔවුන්ගේ වානේ සමාගම අලෙවියේ සිට නිෂ්පාදනය දක්වා විතැන් වන්නේ ඉන්දීය වෙළෙඳපොළට විලී ජීප් (Willy Jeeps) රථ එකලස් කිරීමේ බලපත්‍රය නතු කරගනිමිනි. 1963 දී International Harvester සමාගම සමග බද්ධ ව්‍යාපාරයකට එළඹෙන මහින්ද්‍රා සහ මහින්ද්‍රා සමාගම අන්තර්ජාතික ට්‍රැක්ටර් සමාගමක් ඇරඹීමට කටයුතු කරයි. නමුත් 1971 දී ඔවුන් හා වූ හවුල නිමවෙයි.

1990 මුල් භාගයේදී ගෙවුම් ශේෂ අර්බුදය හේතුවෙන් ආර්ථිකය ලිබරල්කරණය කිරීමට ඉන්දියානු ආණ්ඩුව තීරණය කරයි. ඒ සඳහා ක්‍රියාමාර්ග ගණනාවක් ක්‍රියාත්මක කරන්නට යෙදුණු අතර, ඉන්දියාව විදේශ වෙළෙඳ සහ ආයෝජනය සඳහා විවෘත කිරීම, පුද්ගලිකකරණය, පාලන සීමා සහ නීතිරීති ලිහිල් කිරීම සහ බදු ප්‍රතිසංස්කරණය ඉන් කිහිපයකි.

මේ වෙනස්වීම් සමග පවුල් සමාගමේ සේවා සංස්කෘතිය වෙනස් කරනවාද නැත්නම් රට මුහුණදෙන නව ජාත්‍යන්තර තරගකාරිත්වය හමුවේ පසු බසිනවාද යන්න මහින්ද්‍රා තීරණය කළ යුතු විය. සාම්ප්‍රදායිකව දීවාලි උත්සවය වෙනුවෙන් ආයතනය විසින් ලබාදෙන ප්‍රසාද දීමනා වහාම ක්‍රියාත්මක වන පරිදි ඵලදායිතාව සමග සම්බන්ධ විය යුතු වග ඔහු දැනුම් දුන්නේය. සේවකයෝ තම ඵලදායිතාව ඔප්පු කළ යුතු විය. මහින්ද්‍රා වහා සේවක ප්‍රජාව ඇමතීය. ඔවුන් කැමති වුවත්, නැති වුවත් ඉදිරියේදී නොමිලේ දිවා ආහාර ලබා දීමක් සිදු නොවන බව ඔහු පැහැදිලි කළේය.

වෙනස සිදුවිය. පැරණි සේවා පද්ධතිය තුළ 1200කට අධික පිරිස දිනකට එන්ජින් 70 ක් නිපදවූ අතර, 1994 වන විට 760ක් වූ සේවක පිරිසට දිනකට එන්ජින් 125ක් නිපදවිය හැකි විය.

ලෝකයේ ප්‍රමුඛතම ඔටෝමෝටිව් නිෂ්පාදකයන් සමග තරග කිරීම සඳහා තම සමාගම ලෝකව්‍යාප්ත කිරීමට මහීන්ද්‍රා කටයුතු කළේය. 1995 දී මහින්ද්‍රා ෆෝර්ඩ් ඉන්දීය සමාගම නිර්මාණය කිරීම සඳහා මහින්ද්‍රා සමාගම ෆෝර්ඩ් මෝටර් රථ සමාගම සමග 50 ට 50 බද්ධ ව්‍යාපාරයකට එළැඹිණ. එම බද්ධ ව්‍යාපාරය සිතූ පරිදි සාර්ථක නොවූ අතර, ඔවුන්ගේ පළමු නිෂ්පාදනය වන, the Ford Escort අලෙවිය දුර්වල වූයේ වසර 5 කට පසු එය නවතා දමන්නට සිදුවෙමිනි.

බද්ධ ව්‍යාපාරයේ වැඩි අයිතිය ෆෝර්ඩ් වෙත පැවරුණු අතර, 1998 දී ඔවුන් තම අයිතිය 72% දක්වා ඉහළ නැංවූ අතර, සමාගමේ නම ෆෝර්ඩ් ඉන්දියා පුද්ගලික සමාගම ලෙස වෙනස් විය. නූතන මෝටර් නිෂ්පාදනයට නොගැලපෙන ක්‍රියාවලියක් ලෙස මහින්ද්‍රා මේ ක්‍රියාවලිය දුටුවේය.

ඉදිරියට.................